Вершы і казкі для дзяцей

Вершы для дзяцей

У школу

Вашая адзнака Нет Сярэдняя: 3.7 (3 галасоў)

А ў Максіма,
А ў Максіма —
Сёння ранец
За плячыма.

Гэта ў школу йдзе
Максім:
Ён вялікі ўжо
Зусім.

Досыць з дзецьмі
Хлопцу знацца —
У пясочніцы
Капацца.

Гульбы ў школе
Ён забудзе —
Літары вучыць
Там будзе.

Тыя літары,
Лічы, —
У дзівосны свет
Ключы.

Перад ім
Яны расчыняць
Сонечныя
Далячыні.

Павядуць яны
Максіма
Па шляхах усіх
Радзімы,

Па далінах,
Па гарах,
Па чароўных
Гарадах.

А пасля ён
Скрозь туманы
Ўбачыць моры,
Акіяны —

З белай чайкаю,
З вірамі,
З зорамі
Ды з караблямі.

Ён пазнае ўсё
Як трэба
Пра зямлю сваю,
Пра неба,

Пра бяздонны вір
Сусвету,
Найдалёкія
Планеты.

Тыя
Літары-ключы —
Толькі добра
Іх вучы! —

Адамкнуць табе
Таксама
У часоў мінулых
Браму,

На вачах —
Вось цуд які! —
Вернуць
Даўнія вякі...

Сёння ў школу йдзе
Максім:
Свет вялікі —
Перад ім!